Былыргы дьылым

былдьаһыктаах уорҕатыгар

Кэлэр кэмим кэтэһиилээх

Кэрдиис кэмигэр

Былыыр-былыр

Ото-маһа хайдаҕын

Оҥостон туран көрдөххө,

Ото оттон ордук,

Маһа мастан ордук

Муҥутаан сиппит эбит.

Толуу-бөдөҥ дьон

Туруорунан турарыныы,

Тиит маһа сэлээбит,

Кылба маҥан таҥастаах

Кыраһыабай кыргыттар

Сапсына туралларын курдук

Чараҥ тыа эҥээрдэммит.

Көтөр-сүүрэр сатыылаабыт,

Кэрээбэт кэҕэлээх,

Кыстыыр кыталыктаах

Күн тахсыыта ыллыыр

Күөрэгэй чыычаахтаах.

Маннык үтүө

Мааны дойдуга

Ураанхай саха

Ууһаан-үөскээн

тэнийэн эрэр

Кэмэ эбит быдахтаах.

Ноо!

Маннык үтүө

Мааны дойдуга

Анаан-миинэн

Айыллан ананан

Бу сири булбут

Баардаалы баай оҕонньор,

Сарбарыйа хотун эмээхсин

Ыыр үктээн айбардаан

Ыал буолан сабардаан

Олорбуттар эбии кэрэхсэтэн,

Кинилэр диэтэх дьон

Киэҥ сиринэн сылдьан

Бултаан-алтаан,

булан-талан,

Байан-тайан

Олорбуттара эбитэ үһү!

Ол гынан доҕоттоор,

Бу дьоммунт

бааттахтара кырыарыар диэри

Аат ааттатар

Оҕо төрөөн үөскээбэтэх эбит

Тыый!

Арай биирдэ

Сарбарыйа хотун эмээхсин

Тап-татакай буолбут,

Күн сирин көрөр

Кэмэ тиийэн кэлэн

Хардаҥ окко

Оройунан түһээт,

Бу оҕо киһибит

Саҥалаах буолан кэлбит,

Ырыалаах буолан түспүт.

Ыкса турбут өмүрбүт,

Ыраах турбут соһуйбут.

Бу оҕобут барахсан

Биир хоноот биирдэнэн,

Икки хоноот иккилэнэн,

Үс хоноот үстэнэн

Омуннаахтык улааппыт,

Үөскүлэҥник үүммүт.

Оҕонньордоох эмээхсин

Олуһун үөрбүттэр.

Ойор күннэрэ сырдаабыт,

Олуктара кэҥээбит,

Олохторо киэркэйбит.

Үтүө үгэс сиэринэн

Үөрэ-көтө сибигинэһэн,

Ураанхай сахаҕа

Улуу бухатыыр

Төрөөтөҕө диэн

Уостарынан ботугураан

Аал уоттарыгар

Ас кээспиттэр.

Дьэ эрэ!

Суулаабыт тиит курдук сотолоох,

Хастаабыт тиит курдук харылаах,

Үс былас үөкэйэр өттүктээх,

Биэс былас биэкэйэр бииллээх,

Алта былас дараҕар сарыннаах,

Буутун этэ буспут,

Холун этэ хойдубут,

Сиһин этэ сиппит,

Дуолан кэтиэ көҕүстээх,

Куудара баттахтаах

Кырыылаах уһун

Субурхай муруннаах,

Сити гынан баран

Баайга төрөөн бардам,

Токко үөскээн дохсун

Бухатыырга моһуоннаах

Киһи киэнэ

Кииллээҕэ эбит

Уол оҕо барахсан

Уоһаҕа кууран,

Уолугунан тыынан

Уһуну, киэни толкуйдаан,

Уйулҕата хамсаан

Тэһийбэккэ барбыт,

Тэбиэһирэн кэлбит.

Инньэ гынан

Кэрийэр санаата

Үүйэ-хаайа тутан

Ойуурун диэки

Ойон хаалбыт.

Ноо!

Онтон Баардалы баай,

Сарбарыйа хотун

Уолларын сүтэрэн

Уолуйа аймаммыттар,

Атахтарынан баран

Арҕааттан ыйыппыттар,

Сурах оҕустаран

Соҕуруу көрдөөбүттэр,

Илдьит ыытан

Илин ирдээбиттэр,

Хонугунан тиийэн

Хотуттан ыйыппыттар да,

Харахтаах да көрбөтөх

Кулгаахтаах да истибэтэх

Ууга устубут курдук

Олуга суох барбыт

Кэтэһэн, кэтэһэн

Күннэрэ кылгаабытын кэннэ,

Күүтэн, күүтэн

Күүстэрэ быстыбытын кэннэ,

Арай биир сарсыарда

Илин диэкиттэн

Айаннатан астаран,

Сэргэлэрин таһыгар

Хорус гына түспүт.

Оҕонньордоох эмээхсин

Туох хайа кэллэ диэн

Уолларын сураһаары

Ойон тахсан көөртөрө

Көрдөр харахтара дьүккэтэ,

Көтүтэр тиистэрин миилэтэ

Илэ бэйэтинэн

Кэлэн турар эбит.

Тыый!

Оҕонньордоох эмээхсин

Аймах билэ дьонноро

Айыы сирин

Араҥаччылыыр киһилэннибит диэн

Аҥардастыы айхаллаатылар,

Күн сирин көмүскүүр

Ыччаттаннахпыт диэн

Урутаан туран уруйдаатылар.

Олуһун үөрдүлэр

Балыктары ыата

Күөнэхтэрэ күөрэйдэ

Сайынны күн кылбайа тахсыыта

Соҕуруу диэки чуораан чугдаарда,

Хобо хоҥкунаата,

Сити гынна да,

Мэник кулун аттаах

Сорук боллур уол

Баардаалы баай тиэргэнигэр

Биирдэ баар буолла

Тыый!

Оһуулаатан, оһуулаатан!

Кындыа маҥан аттаахх

Күндэлэй ини бухатыыр

Дорообо, дорообо!

Боло ини оҕонньор,

Күөнэ ини эмээхсин

Күҥҥэ ини көрдөрбүт

Кэрэ-мааны кыыстарын

Сыдьаайа куону

Аллараа дойду ааттаҕа

Тимир Киибэс бухатыыр

Күүс ини өттүнэн

Уоран-талаан барда.

Үрдэ ини биллибэт

Үлүгэр буолла

Анна ини биллибэт

Алдьархай буолла,

Бара охсуон үһү!

Халын ойуур курдук

Хахха буолуон үһү,

Суоһан тиит курдук

Дурда буолуон үһү!-

Диэтэ да Сорук Боллур уол

Этиэх иннинэ

Эҕирийиэх иннинэ

Элэс гынан хаалла

Тыый!

Биһиги киһибит сүрдээҕин

Кыыһырда да, абарда даҕаны.

Дьэ уонна маннык диэн

Ырыалаах буола турда.

Күндэлэй Боотур:

-Дьээ буо, дьээ буо!

Аллараа дойду

Аҥаарыйар ааттааҕа

Тимир Киибэс адьарай

Тоҥ суолгун тордоон

Ириэнэх суолгун ирдээн кэллим.

Кимтэн кииннээх

Хантан хааннах

Киһи кэллин диэтэргин,

Орто дойду дуолана

Кындыа маҥан аттаах

Күндэлэй Боотур буолабын.

Абааһы уола Тимир Киибэс

Утары киирэн анньыһан барда,

Уолуктарыттан ылсан

Уҥа-хаҥас үтүөлэстилэр,

Ууна-ууна дайбастылар,

Уһуутаһа-уһуутаһа тэбиэлэстилэр,

Тоҥ сири тобуктарыгар дылы

Тобулу үктээтилэр,

Ириэнэх сири

Иэччэхтэригэп диэри

Ибили кээстилэр.

Ити курдук ый отут хонугун

Усталаах туоратыгар

Тохтоло суох охсустулар.

Биһиги киһибит

Кыыһырда да

Уһун курбуу батаһынан

Абааһы уолун

Үөлэн кэбистэ

Дьэ эрэ!

Өстөөҕүн өһөрөн,

Санаата көтөҕүллэн

Абааһы ордуутугар

Аанын олуурун тоҕо тардан киирэн

Сыдьаайа куо барахсаны

Сыабыттан босхолоон

Атыгар мэҥэстэн

Биир үтүө күн

Дойдуларыгар тиийэн кэллилэр

Боло оҕонньор,

Күөнэ эмээхсин

Үөрүүлэрэ үксээтэ!

Соргулара үрдээтэ!

Кындыа маҥан аттаах

Күндэлэй Боотур бухатыыр

Күн сирин көмүскүү туруоҕа,

Айыы сирин

Араҥаччылыы туруоҕа,

Саха буолан сандаарыаҕын,

Ураанхай буолан тэнийиэҕин!

Үс саха үксээтин

Биэс саха бииһээтин

Уруй-Айхал!

Айхал-Мичил!